ابي ان كنت في اعين الناس اسيراً ... فأنت الحر في عيني

المدونة تعبر عن رأيي الشخصي
سعد الشاطر

Friday, December 21, 2007

شارك في الاستفتاء


ادلي برأيك في استفتاء يجريه برنامج العاشرة مساء


ورشح القضية العسكرية للاخوان كأهم قضية رأي عام في المحاكم لعام 2007

والقضية الأولي سيكون لها حلقة خاصة

شارك برأيك هنا


www.el3ashera.com

او تكلم علي الرقم
2310


بسعر 1,50 للدقيقة

انشر

Tuesday, December 18, 2007

عـــيد يعني هنضحي



هييييه بكره العيد

هييييه بكره هندبح

هييييه بكره هنروح السجن

هييييه بكره عجووول كتيير هتتدبح

وبهايم كتيير هنخلص منها

وبقر وخرفان

وبرده معييز

-اللي علي راسه بطحه يحسس عليها-

J

كل سنه وانتم طيبين وبخيير

وناس تانيه كل سنه وهما اشرار وظالمين ومفتريين

كل سنه ومصر ان شاء الله تبقي حرة ابيه

ويبقي الشريف فيها حر والمجرم مسجون

كل سنه وانت حر ياوالدي انت واخوانك الكرام

كل سنه وانتم طيبين ياعائلتي الصغيرة

وعائلتي الكبيرة المجاهدة(احلي عيلة)

كل سنه وزوار المدونة بخير وفي احسن صحة وفي سعادة

كل سنه وانا في اجازة اسبوع من الجامعه واخيرا هنام

يارب السنه اللي جايه تبقي احلي

وان شاء الله مايبقاش في ولا مبارك ولا جمال ولا سوزان ولا العادلي

ولا اي ظالم فاسد حرامي في البلد

كل سنه وانا داخل انام علشان انا في اجازه

ومفيش جامعه بكره

J

سلام وتصبحوا علي خيير


 

Wednesday, December 5, 2007

معلومات خطيرة تهمك....هل تعلم؟




 

هل تعلم انك اذا التقطت صورة بالكاميرا في يوم


اكتمال القمر.. فانك سترى اشباحا .. ويمكنك ملاحظتهم


بوضوح..







- هل تعلم انك اذا اضفت بصلا الى كميه من


الصودا.. فانه سيتكون لديك غاز الاسيد السام


والقاتل..










- هل تعلم انه في احدى المحيطات البعيدة توجد


دوامة بحرية من يسقط بها يجد نفسه في الفضاء


خارج الغلاف الجوي..






- هل تعلم انك اذا اكلت فاكهة بعد شربك للقهوه


فانك ستموت فورا .... وهذه حقيقه لم يستطع العلماء


تفسيرها..











- هل تعلم انك اذا تحدثت في اليوم الواحد اكثر


من 1400 كلمة.. فانك مهدد بالاصابة بجلطه دماغية..











- هل تعلم انك اذا استلقيت على الرمال لمدة 5


ساعات متواصلة فانك ستجد نفسك


في الجهة الثانية من الكرة الارضية.. وهذه حقيقة


لكن غير مجربة حتى الان..











- هل تعلم انك اذا قلت.. زوباغ.. ريباغ..عسواج..مزهاغ.. مشحاخ..


فانك سوف تسمع أصوات اشباح












******************************

^^^^^^^^^^^^^^^^^^^^^^^^^

******************

^^^^^^^^^^^^

*********

^^^^^

**










- هل تعلم انك لو صدقت كل اللي اتكتب فوق


*****



يبقى حرام فيك نعمة العقل

J

Thursday, November 15, 2007

يوميات واحد في الجامعة



الايام دي الله ينور علي الدراسة

كل يوم الصبح الساعة 8:30 الصبح عندي محاضرة

واخلص الساعة 6

حاجه تقرف كل يوم اصحي الصبح اقول

الله يخربيت وزير التعليم العالي

وبالطريقة دي ماروحتش لوالدي

بقالي كتييير

لا سجن ولا محكمة ولا اي حاجة



حسبنا الله ونعم الوكيل في اللي ظالمينا

وفي اللي حارمني علشان التعليم

----
ان شاء الله هبقي اكتب حكاية الدراسة معايا من الأول خالص
انتوا ادعولي بس

Friday, November 9, 2007

قعدتوا ليه ... روحروا اتنيلوا



لما المعلق قدم الماتش وقال
وقد قام السيد الرئيس بالحضور بنفسه والسيده قرينته

انا قلت يا دي النيله خسرانين ان شاء الله
والدستور في نفس اليوم كان كاتب
الشعب المصري وسط الغرقي

والغلاء والسحابة السوداء

ينتظر الكائن الوحيد اللي بيفرحه

راحت الست قالت ازاي لازم الشعب مايفرحش

قوم البس ياريس يللا نروح الماتش

ازاي الشعب يفرح

راحوا الاتنين حضروا وكمان جابوا نظيف وطنطاوي
يعني الموضوع كان باين من الاول
الاهلي هيخسر

وفعلا خسر الاهلي خساره مدويه

-3\1

وحزن واتنكد الشعب المصري

يارب عليك بمبارك والمدام والعيال

وانزل عليهم كوره كبيرة اد الجبل وهما نايمين النهارده

علي دماغهم علشان حرقوا دمي
ودم كل الاهلاوية

ودم كل المصريين

Thursday, November 1, 2007

انا عيّان ... ادعولي




انا اعتذر عن عدم متابعتي للتدوين الفتره الماضية




بس انا مريض اليومين دول




وادعولي لأن الدراسه شده اليومين دول

Friday, October 26, 2007

أُوْلَـئِكَ مَا كَانَ لَهُمْ أَن يَدْخُلُوهَا إِلاَّ خَآئِفِينَ

عندما يصلي السيد الرئيس مبارك اطال الله في اختفاؤة
صلاة في المسجد فالجميع يعلم انه يصلي في الصف الاخير
ولكني علمت من مصدر سري تفاصيل صلاة الرئيس في مسجد شرم الشيخ
هو وشيخ الازهر
فعندما يكون الرئيس في المسجد
فانه يصلي في الصف الاول ولكن يكون خلفه حيطه
للامان ويكون صفه به الوزراء وكبار رجال الدولة
اما الصفوف الخلفية فانها تكون بها الحراس
وافراد الحرس الخاص
ويحكي احدهم انه قبل الصلاة يقال لهم ان الامام
وعادة يكون شيخ الازهر
سوف يقوم قبل ان يقوم من الركوع والسجود بالكحكحه
فيقوم الحراس من السجود او الركوع قبل ان يقوم
...سيادته خوفا عليه من
ويحكي ايضا ويقول
في مره حبيت ماسجدش بعد الامام وقلت هاشوف هيحصل ايه
فقال لقيت اللي جنبي راح ساجد وواخدني معاه بإيده
الآيه الكريمة بتتحقق بالظبط
قال تعالى "وَمَنْ أَظْلَمُ مِمَّن مَّنَعَ مَسَاجِدَ اللّهِ أَن يُذْكَرَ فِيهَا اسْمُهُ وَسَعَى فِي خَرَابِهَا أُوْلَـئِكَ مَا كَانَ لَهُمْ أَن يَدْخُلُوهَا إِلاَّ خَآئِفِينَ لهُمْ فِي الدُّنْيَا خِزْيٌ {وَلَهُمْ فِي الآخِرَةِ عَذَابٌ عَظِيمٌ "{ البقرة :114

Saturday, October 13, 2007

عيد جديد وعلي ظلمك لنا يا مبارك شهيد



يا كاتب التاريخ مهلا


لا تتعجل .. تأني وانظر الي هذا العيد

ولا تطوي صفحة التاريخ وتكتب


هو عيد فرح فيه الناس


لأنني لم افرح


لم افرح لأن نظام مبارك الفاسد


"حرمني من فرحتي في هذا اليوم "السعيد


لقد حرمني من ابي


ووضعه في سجن الذي هو مكاناً للمجرمين والخائنين


لا للشرفاء والابرياء


بل وان هذا النظام الفاسد المستبد


قد تمادي في ظلمه وجبروتة


اكتب ايها الكاتب في سجلات التاريخ


فهذا هو العيد الثاني علي التوالي الذي احرم فيه من ابي


والعيد السادس عشر من عمري


وذهبت اليه وانا لا اكاد افرق بين يوم العييد والايام الاخري


الا بأنني قد صليت صلاة بلا اذان


بها سبع تكبيرات


والزحام الشديد في سجن طره


هو ماجعلني افرق بينهما


الا انني علي نقيض كل من حولي من اناس يمشون في الشوارع



ويعلقون الزينات


ويفرحون ويضحكون


كنت انا حزينا بسبب حرماني من والدي

------
اللهم عليك بالنظام الفاسد الذي سرق اباءنا لنخاف


وسرق اموالنا لنجوع
حسبي الله ونعم الوكيل

Friday, October 12, 2007

ياااااااااااه ... للدرجة دي




حتي مش عايزنا نتألم بصوت عالي





مش عايزنا نوصل صوتنا للناس علشان يحسوا بحالنا





ياااه .. حسبنا الله ونعم الوكيل





يضربونا ولما نقول لآه يلومونا ويحاولوا يمنعونا





"امبارح باليل كلمني محمد عادل "ميت





قالي اتفرج يا عم سعد





انا وانت وكام مدونة كمان محجوبين في مصر





انا رديت قلت بتاعة والدي





قال اه





قلت وميين حاجبها




قال اللي بيحجب هنا في مصر 3 جهات





المخابرات والرئاسة وامن الدولة





علي طول اتصلنا بالشركات بتاعة السيرفر





قالوا المشكله مش من عندهم ولا يعرفون ما مصدرها





حسبنا الله ونعم الوكيل





حجبوا السرفر بكاملة وهو يضم مدونات ومواقع اخري مثل ميت





الي هذا الحد وصل بك الفساد ايها النظام




الآن المدونات محجوبه داخل مصر ويمكنك زيارتها من خرج مصر





الرابط التالي





---
تحديث
بعض الشركات لم تحجب المدونه
وبعضها يحجبها
ويذكر ان مثل هذا الموقف حدث مع اخوان اونلاين
وكان علاء عبد الفتاح قد شرح هذه الحالة مع اخوان ويب
وتم فك الحجب بعد فتره

Tuesday, October 9, 2007

ومن اظلم ممن منع مساجد الله ان يذكر فيها اسمه وسعي في خرابها


بالأمس فوجئت ان شيخ الازهر


قد قام بالتعديل في المناهج الازهرية


والغاء تدريس المذاهب الاربعة بالازهر


وما يسمي بالفقه المقارن


اللي كان اجانب كتييير من بلاد كتيير


بيجوا مصر هنا علشان يدرسوا المذاهب الاربعة


وبعدين كلنا نعرف ان الدولة اللي تتبع نظام المذهب الواحد هيا السعودية


والغاء تدريس المذاهب الاربعة


واختيار كل طالب مذهب ليدرسة


هذا يعني الدعوة الي التعصب


وعدم الوسطية


يعني شيخ الازهر كبر في السن


مش يبدأ في اصلاح الازهر

لأ لازم يسيب عمل ينفعه في القبر
واصلا امريكا معترضه علي نظام التعليم الازهري
بدعوي تنشئة الارهاب
وازدواجية التعليم بمصر
يعني هما بينفذو تعليماااات
وبياخدونا خطوة خطوة
وعلشان كده تلاقي المسئولين لما بيدخلوا المساجد
بيكونوا خايفين وفي حراسة مشدده
زي ما جاء في القرآن
قال تعالى "وَمَنْ أَظْلَمُ مِمَّن مَّنَعَ مَسَاجِدَ اللّهِ أَن يُذْكَرَ فِيهَا اسْمُهُ وَسَعَى فِي خَرَابِهَا أُوْلَـئِكَ مَا كَانَ لَهُمْ أَن يَدْخُلُوهَا إِلاَّ [خَآئِفِينَ لهُمْ فِي الدُّنْيَا خِزْيٌ وَلَهُمْ فِي الآخِرَةِ عَذَابٌ عَظِيمٌ " [البقرة :114
ان شاء الله الخزي قريب
وحسبنا الله ونعم الوكيل

Sunday, October 7, 2007

انا محتجب


اليوم قررت الاحتجاب عن التدوين

تضامنا مع رؤساء التحرير المحالين للقضاء

Saturday, September 29, 2007

اجازة


قررت اني آخد اجازه اسبوع


لأن الاسبوع ده هاكون


مشغول فيه جدا


ان شاء الله


المهم ان كل الزوار يدعولي جامد جدا


لاني بمر بمراحل صعبة جدا


وهي مراحل اتخاذ القرار


وتحديد طريق المستقبل


وعندي مشاكل كتيير


المهم ادعوووولي كتييير


علي ان اعود يوم


2007-10-7


ان شاء الله

Monday, September 24, 2007

في نقد الشعار


في الآونة الاخيرة


وجه الكثيرون انتقادات كثيرة لجماعة الاخوان


حول الشعار الذي تستخدمة الجماعه


والمتمثل في سيفان يتوسطهما مصحف


ولكنني اري ان هذا الشعار هو الشعار الامثل


بل وإلي الآن لم اري شعارا احسن منه كي تتخذه الجماعة شعاراً لها


فهذا الشعار من وجهة نظري يحمل معان كثيرة


بل وانه يمكن ان نتخذه شعاراً في جميع الحالات


فهو يتكون من السيفان


وهما يرمزان الي المقاومة والدفاع عن النفس في حالة الحرب


اما المصحف فانه يرمز الي حالة السلم


فعندما كان المسلمون في حروبهم قديما


يرودون السلام كانوا يرفعون المصاحف علي السيوف


اما المشكلة فتكمن في انه يجب استبدال السيفين


وانا اري ان مايصلح مكانهما هو مسدسين


حيث ان السيف هذا كان يرمز الي الدفاع عن النفس قديما


اما الآن فإن المسدسات والاسلحة المتطورة هي التي حلت محل السيوف


فيجب علينا ان نعمل


UPDATE


للشعار حتي نواكب التطور والتقدم


-------

تحديث

-

محمد عادل كان بيعلق علي التدوينة دي

فكان بيقول سيفان يعلوهما مصحف

او مصحف يحميهما سيفان

فحبيت اقول ان الوصف ده يجسد مميزات هذا الشعار

حيث ان الاولي كما قلت توصف حالة السلم

اما الثانية فتوصف حالة الدفاع عن الاسلام والمسلمين

ملحوظة


المشكلة التي اتحدث عنها ليست مشكلة كبيرة


ولا تستدعي جدالا ونقاشا كبيرا


ولكنه مجرد اقتراح

Sunday, September 16, 2007

كلام في كلام



 

البوست ده هكتب فيه حاجات كتير غير بعض


 

اول حاجه


 

بمناسبة رمضان اكرر


 

كل سنه وانتو طيبين


 

ويارب يعود عليكوا الايام بخيير يارب


 

تاني حاجه


 

في قضية اكياس الدم بتاعة شركة هايدلينا


 

بتاعة هاني سرور


 

هوا ليه عملو كده في الراجل بتاعهم؟؟


 

يمكن بيضحوا بيه؟


 

المهم ان مفيش حد كتب واتكلم وعمل ضجة


 

ولا انتوا تفضلوا تقولوا هاني سرور واكياس الدم والظلم


 

ادي الراجل اتحبس ... شوفتوا العدل

;)


 

تالت حاجة


 

افطار الاخوان خلاص بخ


 

والواحد صراحة اترحم من حاجه صعبه اوي


 

وهيا اننا كل افطار كنت دايما اروح مع ابي


 

وكنت باروح معاه


 

اما الافطار ده كنت هاروح بصفتي ابن معتقل

L

واحب اقول دا نظام مابيكسفش انه يمنع الافطار


 

وحسبنا الله ونعم الوكيل


 

رابع حاجة


 


 

سمعنا كتيير عن ان الشعب المصري عنده سلبية اوي


 

فحبيت اجيبلكوا النكته اللي قاليتهالي اختي


 

بيقول مره اتنين مسئولين


 

واحد بيراهن علي ان الشعب المصري


 

لو عملتلوا ايه مش هايتحرك


 

والتاني بيقول لا ده هيثور لو اي حاجه مش عاجباه


 

فحبوا انهم يعرفوا مين اللي صح


 

فقالوا هيبنوا كوبري


 

وياخدوا من كل اللي يطلع عليه اتنين جنيه


 

فلاقوا ان الكوبري زحمة وماحدش بيقول تلت التلاته كام


 

فالراجل قال ايه ده معقوله


 

فرد عليه المسئول الاخر وقال انت لسه ماشوفتش حاجه


 

فزودوا الفلوس لخمسه جنيه


 

وبرضه لا حياة لمن تنادي


 

فقاموا قالوا طيب كل اللي هيطلع علي الكوبري


 

هيدفع خمسه جنيه


 

وهياخد علي قفاه


 

تاني يوم لقوا اتنين واقفين رافعين اديهم


 

فالمسئول قال مش قولتلك


 

فقال الراجل الاولاني


 

انا بقترح انكوا تزودوا اللي بيضربوا شوية


 

علشان مانقفش كتيير


 

والتاني قال انا عديت امبارح وماضربتش


 

اخيراً


 

انا بفكر نعمل فوازير علي النت


 

يعني مثلا نقول كل يوم سؤال


 

والناس تجاوب عليه في التعليقات


 

بس نوحد الاسئلة


 

ايه رأيكوا؟


 

Tuesday, September 11, 2007

اهلاً رمضان




 

كل عام وانتم بخيير


 

واعاد الله عليكم شهر رمضان بالخير واليمن والبركات


 

وجعله الله شهر فرج لنا ولمصر ولأمتنا جميعا

------------------------------


 

اليوم : اول يوم من شهر رمضان المبارك


 

المكان : البيت


 

الميعاد : وقت الافطار


 

المناسبة : العيلة متجمعة علشان تفطر مع بعض


 

يتجمع جميع افراد العائلة للافطار


 

وبعد جلوس الجميع


 

اكتشفوا انه هناك فردا ينقصهم


 

هذا الفرد هو اهم فرد من الذين يجب ان يحضروا


 

يألهي .. الن يأتي؟!!


 

الم يكن حاضراً معنا في اول يوم في رمضان الماضي؟؟!!


 

هل سيأتي ياتري؟؟؟


 

هل سيفطر معنا في هذا الشهر يا تري؟؟؟


 

ياتري ما هو حاله الآن وهو يفطر اول يوم في رمضان بعيدا عن اهله؟؟


 

بل وهو في سجن اعتقل فيه ظلما وزوراً


 

فليتخيل كل قارئ الآن يقرأ هذه الكلمات نفسه


 

وهو بعيدا عن احب الناس اليه في اول ايام هذا الشهر المبارك


 

وهو محروم منه في حين ان كل الناس حوله ينعمون


 

بالفطور مع من يحبون في هذا اليوم


 

لا اقول لكم لا تهنئوا هذا اليوم بالفطور


 

ولكنني اطلب ان تتذكروا ان هناك اناس


 

حرموا من ابائهم وازواجهم وذويهم


 

يريدون دعواتكم في مثل هذا الموقف


 

لا تنسونا من صالح الدعاء عند الافطار


 

حسبنا الله ونعم الوكيل

Tuesday, September 4, 2007

آه واحدة ... لم تعد تكفي



في هذا الزمن




لم تعد تكفي آه واحده




لم تعد تكفي الآهات




لم تستطع الآهات ان تقوم بوظيفتها




كل ما حولي يدعو الي الشعور بالعجز




اللهم اجعل لي فرجا مما انا فييه




ادعووووولي

Wednesday, August 29, 2007

في نقد الرئيس


.
بما اننا نؤمن بحريه التعبير

.
ونقبل الرأي والرأي الآخر

.

فعذرا سيدي الرئيس

.

فأنا الرأي الآخر

-------
عندما تم الاعلان عن رابطه اطفال من أجل الحريه

.

( قلنا يا سلام دي حاجه حلوه اوي )

.

تم الاعلان عن موعد الانتخابات

.

(الله)

.
بعد ذلك اعلن ان الانتخابات كانت حره ونزيهه

.

(ياسلام هوا دا اللي مفتقد ينوا )


وبعد التصويت اللي كان عبر الصندوق الشفاف
.
فاز انس مالك

.

( كمان ايه الحلاوه دي )

.

. ولــــــــــــــــــكن ...........!!!!!

.
بعد الفوزالساحق الذي تحدث به الرئيس الي
.
وسائل الاعلام

.
(اشكر الناس اللي حطوا ثقتهم فيا )

.

(اللي هوا 5 أصوات مقابل 3 )

.
(وباوعدهم اني هعمل جاهدا عشان اكون
.
قد المسئوليه )
.
فأين انت ايها الرئيس لم نرك بعد الانتخابات

.

لا في وسائل الاعلام ولا في الواقع حتي

.

( خلاااااااص)

.

ولما قولتله ايه أول حاجه هتعملها

.

قالي

.

( مفيش انا منصب صوري بس )

.

( قولنا خلااااص )

.

لا وايه قاللي

.

(مسؤليتي اني انظم العيال في طوابير )

.

استشهد بقول عائشه حسن مالك

.

وقد بدي عليها علامات الحزن

.

بسبب ندمها علي ترشيحها لاخوها بقولها

.

( دا رئيس علي نفسه )
.
. ( انا ما بوقعش ما بينهم ولا حاجه ) .
.

.
.
أقول لك كما قال أحد الخلفاء لوليه يحاسبه

.

( كثر شاكوك وقل شاكروك فاما اعتدلت
.
واما اعتزلت ) .
.


.
وأقول لك ناصحا

.

( هات خمسه جنيه ومش هتشوف وشي تاني )

.
إحم إحم

.
احمد عصااام

------
الرساله مرفق معها ورقه بيضاء لكتابه الاستقاله
.
عليها

.
او ممكن تعملها ظرف وتحط فيه الخمسه جنيه

.
والسلام عليكم ورحمه الله
---------------------
شرف العمل الصحفي :ـ

.
الرساله لا تمس شخصيه انس مالك

.
ولكن نحو غد مشرق لرابطه اطفال من اجل الحريه

.
وعفوا مره اخري سيدي الرئيس

.
ولكن هذا لا يخفي حسنات الرئيس

.

الذي كان علي رأسها السجود لله شكرا بعد هذا
.
الفوز
.
الساحق .

Sunday, August 26, 2007

ابي ... لا اريدك متألماً



ابتاه لا تتألم
-
ابتاه انت جبل
-
انت رجل
-
في زمن قل فيه الرجال
-
ابتاه كن قويا
-
عند مرضك
-
كما انت دائماً
-
اقول اليك ابتاه
-
انت اقوي ولذلك اعتقلوك
-
حماك الله وحفظك
-
وشفاك
-
وأقول
-
اللهم اشفي ابي
-
واجعل كل الم يتألمة لعنة علي ظالمية
-
وانتقم منهم ياربنا
-
تابعوالتفاصيل
-

Saturday, August 25, 2007

والت ديزني ... والتسلية البريئه

الفيلم ده يوضح اهداف شركة والت ديزني الخبيثه

Monday, August 20, 2007

تااااااااااج

التاج ده جالي من حبيبي محمد النجار
بسم الله
اسم مدونتك؟؟
الصراحة انا عندي مدونتين
واحد بيحب مصر .. ودي فيها ارائي الشخصية
و رجل حر رغم القيود .. ودي للدفاع عن ابي وهي تعبر عن اسرتي
لماذا اخترته ..وماهي نيتك من وراء اختياره؟
والله لما فكرت اعمل مدونة شخصيه فكرت كتيير
وبعدين لقيت ان اللي بيعمله النظام معانا دلوقتي
من ظلم وفساد ده كله علشان يخلينا نكره مصر
فقررت اني اسمي المدونة هذا الاسم
وعلي العموم في البوست ده موضح النقطه اوي
هل فكرت في إغلاق مدونتك؟ والسبب؟
لا لم افكر في هذه المدونة .. بل علي العكس
فانا ازداد حماسا من حين لآخر
صورتك في المدونة ورمزيتها ؟؟
صورتي هي صوره لوالدي الذي افتقده بشده
ومكتوب عليها الحريه للشرفاء
وهي ترمز لكل المعتقلين الشرفاء وعلي رأسهم ابي
لماذا دخلت عالم التدوين من الاساس؟
والله عندما سمعت بعد اعتقال ابي عن مدونة تدعي انسي
وعند زيارتي لها اعجبتني كثيرا
فتحمست للفكره وقررت التدوين للدفاع عن والدي
التعليقات بالنسبه لك ,اهميتها؟
تمثل التعليقات لي اهم شئ في المدونة
لأنها تعبر لي عن مدي تفاعل القرآء
وعن مدي وقوفهم ضدي او معي
احلى بوست كتبته ...ضع اللينك , ثم اذكر لماذا؟
والله انا المدونة دي ماعليهاش بوستات كتيير
بس تقريبا هوا البوست ده احسنهم
لان اخواتي قالو لي حلو اوي
أفضل بوست قرأته؟ وضع لينكه؟
هوا بوست اتكتب عن ابي
وكان من رجب الباسل
أفضل مدونة قرأتها؟
مدونات كتيير
علي رأسهم انسي
و انا اخوان
ويللا مش مهم
ومش هيبطل
والفجريه
هتعيش وتتحدي احزانها
تهمتها مصريه
هيا كده
يتنفس بصعوبة
واحد من الناس
غريب
لسانها مولوتوفي
ومعلش علي التطويل
أسوأ بوست أسوأ مدون؟
بلاش نخسر حد
بس مدون كبيير وبيشتم الفاظ خارجه اوي
ربنا يهديه
هيحصل ايه لإيميلك لما تموت ؟؟
بفكر ادي لحد الباسورد ولما امووت
يبعت لكل اللي عندي يقول انا مت
ربنا يرحمه
اديت الباسورد لمين ؟
انا عامل باسورد واحد للمدونة والميل
وكنت اديته لاخواتي وعبد الرحمن الحسيني
وعبد الله صادق
وطبعا انسي
كانت إيه طبيعة علاقتك بيه؟
اخواتي
علاقة من بعييد لبعييد
:)
وعبدالله وعبد الرحمن وانسي
دول بجد اكتر من اخوات
اسمك؟
سؤال غريب بس لا مانع عندي
سعد محمد خيرت سعد عبد اللطيف الشاطر
ناقص نتصاحب كمان
:)
المشهور بيه وسط اصحابك؟
سعدوووون
شخصيتك نوعها إيه؟
يعني اسألو حد غيري
السفر بالنسبة لك؟
بحب السفر جدا
ومن احلي الحاجات في حيايتي اني اسافر اتفسح
وقت فراغك بتعمل فيه إيه؟
تقريبا كله علي النت
المود بتاعك؟
ساعات وبذات الايام دي
خنقه غريبه
بس العادي
فريش
الصفات اللي أخدتها من بابا؟
الذكاء وان مخي نضييف
-زي مابيقولوا-
الصفات اللي أخدتها من ماما؟
احب الحاجه تكون علي سنجة عشره
اكتر ست حاجات بكرهها؟
-الحزب الوطني - الريس- ابنه جمال-مراته تيته سوزان-الظلم-لما النت يقطع-
اكتر ست حاجات بحبها؟
ابي
امي
الانترنت
السفر
الفسح
الكوره والاهلي
الانترنت بالنسبه لك؟
حياتي وعالمي الخاص
لو اتمنعت منه امووت
امرره لمين ؟
مش لحد علشان مايبقاش مقلب زي اللي حصلي
بس هعمل تاج وابعته لشوية ناس
اكلتك المفضلة؟
مش عارف
مش حاجه واحده
بس انا ماليش في الاكل البيتي اوي
ليا في التيك اواي والكلام ده
الشغل بيمثلك ايه؟
المستقبل والتدريب عليه مفيد جدا
تقريبا خلاص كده
يللا سلام